दरौंदी मोटरेवल पुलको निर्माण कार्य सम्पन्न

विगत चार वर्ष अघि देखि गोरखा नगरपालिकाको छेवेटार र खोप्लाङ गाविस जोड्ने  एक मात्र निमार्णधिन दरौंदी मोटरेवल पुलको निर्माण कार्य  हालै मात्र सम्पन्न भएपछि गत शुक्रबार दिउँसो गोरखा क्षेत्र नं. २ का सभासद् समेत रहेका प्रधानमन्त्री डा. बावुराम भट्टराईले पहिले रिवन काटेर र त्यसपछि आफ्नो मुस्ताङ म्याक्स गाडी पुल माथी ओहोर दोहोर गराएर उद्घाटन गरेका छन् । पुलको उद्घाटन सँगै उक्त पुल सवारि साधन आवत जावतका लागी पनि शुक्रबारबाटै खुला गरिएको छ । २०६५ जेठबाट निर्माण कार्य शुरु भएको गोरखा सदरमुकाम र पश्चिमी क्षेत्र नं. २ लाई जोड्न दरौंदी नदि माथि बनेको उक्त पुलको लम्बाई ८७ मिटर लामो छ ।

ठेकेदारको ढिलासुस्ति कर्मचारी सरुवा र विवादका कारण लामो समय देखि निमार्ण कार्य रोकिएको दरौंदी पुलको उद्घाटन पश्चात् पश्चिमी गोरखाका गाउँ गाउँमा खुसिको वर्षा पनि भएको छ । उद्घाटन कार्यक्रममा खुलियाली साटासाट गर्न गाउँ गाउँबाट सयौ सर्वसाधारण छेपेटार पुगेका थिए ।

पुल निमार्ण कार्य करिब ५ करोड रुपैयाँमा सम्पन्न भएको निमार्ण कार्यमा संलग्न प्राविधिकहरुले बताएका छन् । उक्त पुलको निमार्ण कार्य पुरा भएर संचालनमा आएपछि गोरखाको पश्चिमी भेगका बासिन्दा र वारपाक, लाप्राक, गुम्दा लगायतका केहि गाविसका बासिन्दाहरुमा समेत खुसियाली छाएको छ । अँझ दरौंदी नदि तारेर यातायात सेवा दिँदै आएका यातायात व्यवसायीहरु खर्च र समय दुबैको बचत हुने भए पछि झनै दङग छन् । 

पुलाभावका कारण हिउँदका महिनामा मात्र संचालन हुँदै आएका यातायात अब पश्चिमी गोरखाका ग्राभेल सडकको पहुँच भएका गाउँ बस्तीहरुमा सजिलै बाह्रै महिना पुग्न सक्ने भएका छन् । यससँगै गोरखा जिल्लाका गाउँ गाउँमा मोटरेबल कच्चि सडकहरु विस्तार भएपछि ग्रामिण भेगबाट संचालन हुने यातायात सेवामा समेत बृदि भएको छ ।